ផ្ដើមពីសាលាទានតូចមួយដែលសាងសង់យ៉ាងសាមញ្ញដោយឫស្សីនិងប្រក់ស្លឹក វត្តជយនទីរតនារាម (អូរក្ដារ) ស្ថិតនៅភូមិអូរក្ដារ ឃុំហ៊ឹងមី ខេត្តវិញឡុង ជាជំហានៗបានកសាងឡើងកាន់តែមានភាពស្រស់ស្អាតនិងសមរម្យ។ ក្នុងដំណើរការនោះ ព្រះភិក្ខុចន្ទធម្មោកៀងថាយហុង ជាព្រះចៅអធិការដំបូងរបស់វត្ត ហើយជាវត្តខ្មែរមានអាយុកាលក្មេងជាងគេនៅខេត្តវិញឡុង។ រួមជាមួយគណៈកម្មការវត្ត ព្រះភិក្ខុចន្ទធម្មោ កៀងថាយហុង បានខិតខំចលនាពុទ្ធបរិស័ទនិងសប្បុរសជននានា ចូលរួមចំណែកក្នុងការកសាងនិងកែលម្អវត្ត ព្រមទាំងដំណើរការកសាងនូវសំណង់ជាច្រើន ដើម្បីបម្រើតម្រូវការរបស់ប្រជាជន។
ព្រះភិក្ខុចន្ទធម្មោ កៀងថាយហុង ព្រះចៅអធិការដំបូងរបស់វត្តអូរក្ដារ។
កើតក្នុងគ្រួសារកសិករខ្មែរ នៅភូមិអូរក្ដារ ឃុំហ៊ឹងមី ខេត្តវិញឡុង។ ឆ្នាំ២០០៧ ព្រះភិក្ខុចន្ទធម្មោ កៀង ថាយហុង បានឱពុកនាំចូលទៅសាងផ្នូសបួសរៀននៅវត្តផ្នោកំបុត។ ក្នុងអំឡុងពេលសាងផ្នូសបួសរៀន ព្រះអង្គបានសិក្សាផ្នែកភាសាបាលី-ខ្មែរ នៅតាមវត្តនានាក្នុងខេត្ត និងបានបញ្ចប់កម្មវិធីសិក្សាពុទ្ធិកមធ្យមសិក្សាបាលី-ខ្មែរ នៅឆ្នាំ២០១៦។ នៅឆ្នាំ២០១៧ តាមការនិមន្តរបស់គណៈកម្មការវត្តនិងពុទ្ធបរិស័ទក្នុងភូមិអូរក្ដារ ដោយមានការអនុញ្ញាតពីព្រះចៅអធិការវត្តផ្នោកំបុត ព្រះភិក្ខុចន្ទធម្មោ កៀង ថាយហុង បានត្រឡប់មកស្រុកកំណើតវិញដើម្បីគង់នៅនិងមើលការខុសត្រូវសាលា។ ក៏ក្នុងឆ្នាំ២០១៧ នោះ គណៈកម្មការវត្ត និងពុទ្ធបរិស័ទបាននិមន្តព្រះអង្គឱ្យទទួលតួនាទីជាព្រះចៅអធិការវត្ត។ កាលនោះ ទីកន្លែងសម្រាប់ធ្វើសកម្មភាពសាសនា មានត្រឹមតែសាលាទានតូចមួយ ដែលសាងសង់យ៉ាងសាមញ្ញពីឫស្សីនិងប្រក់ស្លឹក។ បន្ទាប់ពីការកសាងវត្តទទួលបានការអនុញ្ញាតពីរដ្ឋអំណាច ព្រះភិក្ខុចន្ទធម្មោ កៀងថាយហុង រួមជាមួយគណៈកម្មការវត្ត បានខិតខំចលនាពុទ្ធបរិស័ទនិងសប្បុរសជនរួមវិភាគទានជាថវិកា ជាជំហានៗវត្តបានកសាងនូវផ្នែកសំណង់នានាបម្រើដល់ការប្រជុំជីវភាពសាសនានិងការសិក្សាបួសរៀន។ មកដល់បច្ចុប្បន្ន កុដិព្រះសង្ឃនិងបន្ទប់រៀនត្រូវបានសាងសង់រួចរាល់ ខណៈព្រះវិហារកំពុងស្ថិតក្នុងដំណាក់កាលបញ្ចប់ការសាងសង់ និងត្រៀមរៀបចំពិធីសម្ពោធដើម្បីដាក់ឱ្យប្រើប្រាស់។ ភាពស្រស់ស្អាតរបស់វត្តអូរក្ដារនាពេលបច្ចុប្បន្ន គឺជាលទ្ធផលនៃការរួមចំណែកនិងកម្លាំងរួមរបស់ពុទ្ធបរិស័ទ សប្បុរសជន ព្រមទាំងការយកចិត្តទុកដាក់និងបង្កលក្ខណៈរបស់ភូមិភាគ។
លោកគឹម ជួន អនុប្រធានគណៈកម្មការវត្តអូរក្ដារ បានឱ្យដឹង ព្រះតេជព្រះគុណ កៀងថាយហុង គឺជាព្រះចៅអធិការដំបូងរបស់វត្ត និងបានរួមចំណែកយ៉ាងច្រើនក្នុងដំណើរការកសាងវត្ត។ តាមប្រសាសន៍របស់លោក ព្រះតេជព្រះគុណនិងគណៈកម្មការវត្ត បានខិតខំចលនាថវិកាបានរាប់សិបពាន់លានដុង ដើម្បីកសាងផ្នែកសំណង់នានា បង្កើតជាកន្លែងប្រជុំភាពសាសនាឱ្យកាន់តែងាយស្រួលនិងមានភាពសមរម្យសម្រាប់មាមីងពុទ្ធបរិស័ទ។ មិនត្រឹមតែយកចិត្តទុកដាក់លើការកសាងវត្តប៉ុណ្ណោះទេ ព្រះអង្គក៏បានយកចិត្តទុកដាក់បើកថ្នាក់រៀនភាសាបាលី-ខ្មែរ ដល់កូនចៅពុទ្ធបរិស័ទទាំងក្នុងនិងក្រៅខេត្ត។ ការសិក្សានៅវត្តបានជួយដល់កុមារនិងយុវជន មានឱកាសសិក្សាស្វែងយល់អំពីភាសានិងអក្សររបស់ជនជាតិខ្មែរ។
លោក ថាច់ជូត ប្រធានគណៈប្រជាជនភូមិអូរក្ដារ បានឱ្យដឹង ព្រះតេជព្រះគុណ កៀងថាយហុង មិនត្រឹម តែយកចិត្តទុកដាក់ចំពោះការកសាងវត្តប៉ុណ្ណោះទេ ថែមទាំងបានចូលរួមយ៉ាងសកម្មក្នុងការងារសង្គម។ ព្រះអង្គបានសហការជាមួយភូមិភាគ កសាងស្ពានចំនួន ១៥ ព្រមទាំងចលនាប្រជាជនចូលរួមបរិច្ចាគដី ដើម្បីពង្រីកផ្លូវបេតុងតូចមួយដែលមានទទឹង ១,៥ ម៉ែត្រ និងប្រវែង ១.២០០ ម៉ែត្រ ជួយសម្រួលដល់ការធ្វើដំណើររបស់ប្រជាជនឱ្យកាន់តែងាយស្រួល។ តាមប្រសាសន៍របស់លោកថាច់ជូត សកម្មភាពទាំងនេះបានបង្ហាញពីស្មារតីពុទ្ធសាសនាផ្សារភ្ជាប់នឹងសង្គម ទទួលបានការគោរពនិងកោតសរសើរពីប្រជាជនក្នុងភូមិភាគ៕
ទីទុយ
Ý kiến bạn đọc